ფშავ-ხევსურეთში საველე მუშაობის პროცესში, პარალელურად, ვკრეფდით ბიოგრაფიულ ცნობებს იქაურ ხევისბერთა (განსაკუთრებით ცნობილი თავხევისბერის ბიჭურ ბადრიშვილის) შესახებაც. ეს პიროვნებები ხალხსა და ღმერთს შორის იდგენენ და გამომდინარე აქედან, საკმაოდ დიდი იყო მათი გავლენა აქაურ მოსახლეობაზე. ღვთისმსახურებასთან ერთად, ხევისბერთა ერთ-ერთი უმთავრესი ფუნქცია მორალური კატეგორიებისდმი ერთგულება და მათი განუხრელი დაცვაც იყო - "სწორს ფიქრს აძლევდეს თემ-სოფელს, ცდუნება არა სძირავდეს".
დახმარებისათვის მივმართეთ ისტ. მეცნ. დოქტორს, პროფ. თინათინ ოჩიაურს და ვთხოვეთ, მოეთხრო რაიმე ამ პიროვნებების შესახებ.