ხიხვი
ხიხვი
კახური ვაზის ჯიში
სინონიმი: ჯანანურა
მარცვალი საშუალო ზომის, მომრგვალო ან ოვალური ფორმის. ფერით მომწვანო-ყვითელი, მზისკენ მიქცეულ მხარეს სიდამწვრის ხალები აყრია. კანი თხელია, ადვილად სცილდება რბილობს. რბილობი წვნიანი, მდნადი. წვენი უფერულია, სასიამოვნო გემო თავისებური ჯიშური არომატით. დღევანდელი მდგომარეობა: მცირედ გავრცელებული ჯიშია.
ხიხვის ღვინოს აყენებენ როგორც ევროპული, ისე კახური წესით. დგება სადესერტო მაღალი ღირსების ღვინო. ევროპული სუფრის ღვინო ღია ჩალისფერია, გამჭვირვალე, აქვს სასიამოვნო ჯიშური არომატი, ნაზი, სრული და ჰარმონიული გემო. კახურად დაყენებული კი - მუქი ჩალისფერია, საკმაოდ სხეულიანი, სრული და ჰარმონიული. კარდენახის რაიონში მოყვანილი ყურძნისაგან შექმნილი იყო სადესერტო ღვინო „ხიხვი“, რომელიც იყო მუქი ქარვისფერი, ჰარმონიული, ტოკაის ტიპის ღვინისათვის დამახასიათებელი ბუკეტით, 13% ალკოჰოლის, 5-7% საერთო მჟავიანობისა და 24% შაქრის შემცველობით.
