თანაფა

თანაფა

უდიდაში ქირსიანული დღახუ, ნამუთ იშანუაფუ ახალი სტილით 4 პირელს დო 8 მესიშ შქას იოსე ქირსეშე ღურაშ გერჯგინაფაშ გეშა. თანაფას წჷმი უნჯღვერს 40–დღამი პიჩვანი, ოხვამე ოზადუ, აღსარება დო ზიარობა, ვნებაშ მარა. ქირსიანეფშო თენა რე ზეიმეფიშ ზეიმი, ნამუთ მესიაშ მოლინას იშანუანს, ნამუშეთ მოსეშ კათა ეგვიპტეშ ჭკორალობაშე დუდიშ გიშაღალაშ უკული ოცნებენდესჷნ, მუსჷთ ბიბლიური წიმიმორაგადეეფი ქადაგენდეს დო მუსთ სინედრიონიშ ნებათ ჯვარსეგაფილ ქირსეშ სახეთ გჷნხორციელჷნ.

დუდმაართაშე ხვალე ვნებაშ მარაშ დღალეფს ზეიმენდეს. ხვალე IV ოშწანურას მიაჩჷ თანაფაშ დღახუს ალმახანურ სახექ. ნიკეაშ მაართა მოსოფელიშ ოხვამეშ კათუაქ, 325 წანას დადგინჷ დღახუშ ეშანუა აფუნიშ ბუნობაშ გემაჸვენჯ მარას, იუდეველეფიშ პასექიშ ბოლოს, უთუოთ თიშე გიშაკერძაფილო დო მარაშ ბოლოს. თე შკაფონი უხვადუ ახალ სტილით 4 პირელშე 8 მესშახ. თეშნერო, თანაფა მაყარე დღახუეფიშ კატეგორიას ორხველჷ.

ქორთული სხუნუეფიშ ენციკლოპედიაშ მეჯინათ, თანაფაშ ზეიმი, უჯვეშაშ მეჩხოლარეეფიშ დო უკულ დიხაშმახანდეეფიშ ოაფუნე, საარძო გოახალაფაშ დღახუ რე, ნამუშ უშორაშ ჯინჯეფით წარმართულ რელიგიეფს არსხუაფუდას ოკო, სოდე თინა ორთაშ ღურას დო თანაფას შანულენს.