კრიალოსანი
კრიალოსანი
ზონარზე ასხმული ქარვის, გიშრის, ხის და სხვ. მძივი. მარცვალ-მარცვალ ჩათვლით მლოცველი თვლის, თუ რამდენი ლოცვა წარმოთქვა და რამდენი მეტანია შესრულდა.
სიტყვა "კრიალოსანი" წარმოქმნილია ბერძნული კირიე ელეისონისაგან (Κύριε έλέησον, ძველ ქართულში "კჳრიელეჲსონ") რაც ქართულად ნიშნავს "უფალო, შემიწყალენ". ასეთი წარმოშობა დაკავშირებულია კრიალოსნის თავდაპირველ დანიშნულებასთან: ხშირად ლოცვისას საჭირო იყო სიტყვების "უფალო შემიწყალენ" რამდენჯერმე განმეორება; ამ შემთხვევაში იშველიებდნენ საჭირო რაოდენობით ასხმულ მძივებს, ყოველი თქმისას თითოს ჩააგორებდნენ და როდესაც მძივები გათავდებოდა, მექანიკურად ხვდებოდნენ, რომ ლოცვა დასრულებულია. კრიალოსანს სახელი დაერქვა ბერძნულის და არა ქართულის მიხედვით, რადგან ეს სიტყვები (კირიე ელეისონ) შუა საუკუნეების საქართველოში მისი ქართული შესატყვისის პარალელურად იხმარებოდა.
